Elvasuiten 1

I denne eineståande hytta ventar eit opphald du aldri vil gløyme og ei utsikt du alltid vil hugse. Frå hengekøya framfor det store vindauget kan du kjenne tankane flyte som vatnet i stryka. Klart ser du dei viktige tinga i livet når blikket får kvile i den blanke elva. Kryp nærare din kjære i den digre, deilige senga. Hald rundt det fine de har. Nyt naturen, nyt kjærleiken.

Varme i golvet, champagne i kjøleskapet. To vinglass, to koppar. Presskanne for to, stolar til to. Grillrist og grillpinnar, bålpanne og utemøblar. Eksklusivt bad med dusj som i ein foss: Jølstrafossen kallar vi den. Her inne på det varme badet er den kalde elva så nær at det kjennest som om du står i elva og dusjar i fossen. Salus per aqua, sa dei gamle romerane om sine bad. Difor kallar vi ofte velvere-opplevingar i vatn for Spa. I elvesuiten gir det fleire tusen år gamle omgrepet meining, på nytt:

Salus per aqua: Helse gjennom vatn.